|
اللهجات العربية .. تعالوا يا اعضاء و اكتبوا لهجاتكم هنا
حبيت اسليكم شوي ف ياليت كل عضو يتكرم و يكتب لهجته
لاني من محبي تعلم اللهجات العربية ^_^ و ابدأ انا بلهجتي : بعض المفردات والأمثال الشائعة في اللهجة الإماراتية لاحظت الكثير يحبون اللهجة الإماراتية وحبيت بمجهود شخصي أكتب بعض الكلمات والأمثال اللي خطرت على بالي .. طبعاً مثل باقي بعض دول الخليج نقول للرجل كمثال :إشحالك (يعني كيف حالك) لكن للمرأة نقولها إشحالج (حرف الجيم ما ننطقه جيم لكن ننطقه بالضبط ch بالإنجليزي ونفس الشي في بقية الكلمات الموجهة لمخاطبة المرأة عندنا في الإمارات لهجتنا وحدة ما تختلف إلا في كلمات بسيطة : يعني مثلاً في أبوظبي والعين ودبي نقول : جذي (بمعنى هكذا) لكن في الشارقة ورأس الخيمة يقولون (جذه) بنفس المعنى السابق في أبوظبي والعين ودبي نقول : إهنّيه (بمعنى هنا) لكن في الشارقة ورأس الخيمة يقولون (إهنه) بنفس المعنى السابق في أبوظبي والعين ودبي نقول : منّيه (بمعنى من هنا) لكن في الشارقة ورأس الخيمة يقولون (منه) بنفس المعنى السابق في أبوظبي والعين ودبي نقول : ليش أو شعنه أو إش حقه(بمعنى لماذا) لكن في الشارقة ورأس الخيمة يقولون (جيه) بنفس المعنى السابق والكلمات اللي بكتبها مفيدة وايد لأنها أساسية في الكلام ومتكررة دايماً وحبيت أكتب أمثال بعد لأنها أمثال دارجة ومعروفة والأمثال جميلة لها إرتباط باللهجة وتختصر تجارب ناس في جملة وتعطينا نكهة للموضوع صيغة عبارات وردها : المعونه ....وردها .... كفيت المهونه المعونه بمعنى يعطيك العافيه نقولها لو حد من هل البيت دخل علينا وهو تعبان في شغلة عملها لأهل بيته أو أغراض للبيت المهم شي تعب فيه الإنسان للغير سواء ناحية معنوية أو مادية والرد على هذي العبارة من نفس الشخص لأهل بيته يقولهم كفيتوا المهونه بمعنى الله لا يهينكم كصيغة شكر. مرحبا الساع ...وردها.... الله يرحبك على فضله عبارة ترحيب إجرب أو إجربوا : (الجيم المصرية) والرد من الضيف يقول كلمة جريب أو جريب دام فضلك بمعنى تفضلوا بدخول البيت أو بتناول لفاله أو لفواله يعني الفواكهه التي نقدمها للضيوف ----------------------------------------------------------------------------------- بعض الأمثال الدارجة: اللي ما يدانيك يخرب معانيك: اللي ما يحبك يسىء لك ويشوه صورتك ما يدانيك: ما يحبك معانيك: صفاتك عط كل هوا اشراعة : بمعنى ساير الناس على إختلاف ثقافاتهم وعقليتهم علشان تتفق معاهم أو علشان ما يعادونك أو علشان تاخذ اللي تريده منهم وبالنسبة للشراع في السفينة إذا كان مع الريح نوصل للمكان المقصود الوصول إليه لا يـغـرك رخـصـه تراك بتعـق نصه : بتعق أو يعق: يعني يتخلص من شيء برميه لا سلم العود الحال مردود : بمعنى بعيد الشر عنكم لو في واحد تعرض لحادث وكانت إصاباته تتعالج ومب كبيرة بمعنى ما تأثر هكيل الإنسان نقول هذا المثل على إنه إن شاء الله بيرد حاله أي بيستعيد عافيته وفي مثل ثاني فيه كلمة عود ولكن بمعنى ثاني ما بعد العود قعود : عندنا الناس لما يزورون بعض يدخنونهم (بالعود للرجال وبالعود أو الدخون للحريم) مرتين مره في بداية الزيارة ومرة في نهايه الزيارة وهذا المثل ينطبق على نهاية الزيارة بمعنى ما بيقعدون بعد ما تدخنوا في أخر الزيارة حتى لو الناس قالوا إحنا بنروح نقولهم إصبروا بتدخنون قيل لا تروحون. إللي لادغنه الحنيش يتروع من الحبل: الحنيش: الحية يتروع: يخاف كل شيء له ساس والزيادة من الناس : يتكلم عن مبالغة الناس في تقل الكلام والأخبار يوم الناس اتقفل خميس راح الغوص : بمعنى الإنسان اللي يسوي الشي في غير وقته وفي هالمثل الناس رجعوا من موسم الغوص والحين خميس رايح يعني مسوي العكس وهذا المثل لازم أبتسم كل ما أتذكره. يوم نعلوا الخيل يت الخنفسانه وقالت نعلوني : يت : جاءت بمعنى في فرق كبير بين الأثنين وكذلك الفروقات المختلفة في الحياه وفي أشياء ما تتساوى مع بعض حلي لسانك تلقا الناس خلانك ويشبهه رخ ايدك تلقى الناس عبيدك كن لطيف مع الناس تكسبهم كثر الدق يفج اللحام يفج: يفك اللحام: لما نلحم شيئين ببعض ( في مواد وأغراض البناء) بمعنى كثرة الإلحاح أو الكثرة من أي شي في الحياه بدون تحديد تفسد الأمر المرتبط بالكثرة هذه ..سواء علاقاتنا بالناس أو يكون شخص رافض مبدأ معين ومن كثر ما ألحوا عليه غير مبدأه وهكذا لا تسرف ولو من البحر تغرف : الحث على عدم الإسراف إربط صبعك وكلن بينعت لك دوا : ينعت: يوصف .. والقصد الناس دايماً تخلي نفسها فاهمه في كل شي ويفتون في كل شي سار يدور فايده لقى المصايب زايده : سار :ذهب..بمعنى قصد مثلاً يتعالج وعطوه دوا زاد عليه المرض أو في أي موقف يفكر فيه الإنسان إنه بيستفيد ويحصل العكس تيك التهايم واتنه نايم : تيك: تأتي إليك..بمعنى إنسان ما له دخل في شي وما أذى أحد ويدخلون إسمه في مشاكل اليديد حبه شديد : بمعني (دائماً نتعلق بالأشياء الجديدة في البداية .. وينقال للأشخاص) يه ود مينونك لا ييك أين عنه : يه ود : إمسك ونقول تيود بمعنى تمسك والمثل يقول تمسك بمجنونك لا يجيك اللي أجن عنه إن ما طاعك الزمان طيعه وإستوي ربيعه : يقولها الإنسان وهو متحسر ومب راضي إنه يجاري متغيرات العصر الشبه سلبية أو السلبية واللي تخالف معتقداته ان يتك العوية من السفيه خلها : إذا جاءتك الأفعال السيئة من السفهاء فالأفضل عدم الرد عليهم أو مناقشتهم مدَاح نفسه يباله رفسة : يبيله أو يريدله من سار (أو راح) بليا داعي يلس (جلس) بليا لحاف : مثل شخص راح لحفل وهو غير معزوم بالتأكيد بيشعر إنه غير مرغوب فيه اللي يبا (يريد ) الدح ما يقول أح : ومعناه اللي يريد الشقا والشغل أو العمل ما يتشكى ولازم يتحمل يزهب أو يجهز الدوى قبل الفلعة : الفلعة: ضربه أو جرح يترك علامة في الجبهة أو الوجه بمعنى يستعجل يجهز شي قبل وقته وما يعرف إذا بيحدث ولا لا ويشبهه مثل ثاني يقول يزهب (يجهز) القماط قبل الولد : يزهب يعني يجهز القماط (قطعة قماش يلفون فيها الأطفال اللي توهم مولودين) العين ترغب في المغطى وتعاف كل مكشوف : ينطبق على الأكل أو على الناس بمعنى الناس تمل من الأشياء المكشوفة والواضحة وتجذبها الأشياء الغامضة والمستورة هذا الميدان ياحميدان : بمعنى خلنا نشوف الهمه وإذا الإنسان يقدر يثبت وجوده في مكان أو وظيفة أو غيره رابط راسه بلا ويع ويع : وجع بمعنى شخص ما عنده أي مشكله ويضخم الأمور ويبالغ ويحسس الناس إن عنده مشاكل ما تعرف قديري إلا يوم تجرب غيري : ما نحس بقيمة الناس أو حتى الأشياء إلا لما نبتعد عنهم ونتعرف على ناس إذا كانوا أقل في صفاتهم عن اللي كنا نعرفهم يوَد الحتحات لين يقولك الزمان هات : يوَد (إمسك أو إحتفظ ب )..مثال يوَد يد الولد يوم بتعبر الشارع أو يوَد هذي الأغراض حقك الحتحات ..بقايا الأشياء أو النتف وهنا في هذا المثل فقط معناها أقل مبلغ من المال لين .. بعد حرف الياء في صوت هاء مخففة بمعنى إلى أن البعد بعد قلوب مب بعد دروب : ما تمنع طول المسافات من التواصل مع اللي نحبهم ولازم ما ناخذ البعد حجة عدم التواصل لكن البعد يكون أحياناً سببه عدم المحبة لو كان فيه خير ما رماه الطير: والمعنى شخص يريد يأخذ شي تركه أو رماه أحد قبله والشي المتروك لا خير فيه ولذلك إستغنى عنه الثوب ما ينشق بين عاقل ومجنون بمعنى دائماً الشخص العاقل هو اللي يهدي الأمور كل شارب وله مقصة بمعنى كل غرض أو كل شخص وله الشي اللي يناسبه ---------------------------------------------------------------- بعض الكلمات المتكررة في الحياة اليومية : نسير أو سار: بمعنى نروح أو نذهب أتريا : أنتظر رمسه : يعني كلام ونستخدم بعد كلمة كلام يرمس : يتكلم يتحدث عن خرسان: مبلل مثلاً الشارع خرسان ماي أو المطر خرَس الشارع ماي ..مع تشديد الراء.. أزجر أو يزجر أو إزجروا : ينادي على شخص (الجيم مثل الجيم بالمصري) مثلاً نقول : ليش ما زجرتوني على الغدا أو أقول إزجروا فلان يشيل الأغراض كنَدوره : (مع تشديد النون ) ثوب المرأة أو دشداشة الرجل مول : بمعنى أبداً وعند الكويتيين يقولون مولييه بتشديد أول ياء ونقول ..مول ما في فايدة..أو..مول ما شي أخبار عنهم و كلمة ما شي بمعنى مافي وتنطق بصوت ألف ممدودة بخفيف بعد حرف الشين.. شرات أو شرى : بمعنى مثل..نقول..لقيت شرى أو شرات الأغراض اللي في السوق عند المحل الفلاني الطوي: البئر يغمة : رشفة من أي شراب غرشة : زجاجة فيها سائل ماء أو أي شي أخر الجامه : الزجاج مثلاً جامة السيارة زجاج نافذة السيارة الشيشة : محطة البترول يترس أو ترس أو متروس ومثلها بالضبط كلمة ثانية وهي يدحب وكلمه ثالثة يمزر: بمعنى يملاء يعبي شبرية : السرير وجمعها شباري إش حقه : ليش أو حق شو لفريخات أو لفروخ : الأطفال حَشره : (مع تشديد الشين بشكل خفيف) ازعاج الحوي: الحوش ..فناء البيت صنطر أو صنطرة : فاكهة يوسف أفندي .. اخت البرتقالhttp://leqatar.net/vb/images/smilies/smile.gif ما لي بارض : مالي مزاج مالي خلق ما عندي خلاف: ماعندي مشكله مب معارض بمعنى موافق شقايل : من صيغ الأسئلة.. معناها هو (كيف) مثلاًَ أقول شقايل ما خبرتني إن في ضيوف زارونا أمس أو مثلاَ شخص يكلمني في شي وما فهمت شو قال أقوله هذي الكلمة علشان يعيد اللي قاله تكيه: المخدة الخاصة في الجلسة العربية في المجلس يودَر أو ودَر : بتشديد حرف الدال - يترك الشي عقب: ( من كلمات الوصل بين الجمل في الكلام) بمعنى بعد المنظرة: المراية ..المرآه ودام: الودام هو كل أنواع اللحوم والأسماك اللازمة للطبخ زلاغ أو دلاغ: الجوارب على ويهه أو على ويها : ويهه بمعنى وجهه )وهذا تعبير( بمعنى على نيته تفق أو الفرد : مسدس يعفد أو عفد أو إعفد : ينط يقفز وذا أو ماذاه : إزعاج ..مثلاً نقول أسميك إنك (صدق إنك ) وذا أوماذنا أو ماذاه طفران : وهي عكس معنى الكلمة اللي تستخدم في السعودية المعنى عند السعوديين شخص ما عنده فلوس والمعنى عندنا شخص متملل وضايق صدره ونقول والله إني طفرت بمعنى زهقت أو لشخص نقول صدق إنك طفَرتنا أي أشعرتنا بالملل الشديد وفيها معنى أزعجتنا وخليتنا نزهق مرّه : وبعد نصف معنى أو قريبة شويه من الكلمة اللي تستخدم في السعودية المعنى في السعودية يقولون مره حلو أو مره مب حلو ..يعنى كثير.. ويستخدمونها في الجملة السلبية والإيجابية والمعنى عندنا إحنا نستخدمها فقط في الجمل السلبية ...وبمعنى أبداً أو بالمره... مثلاً نقول مره مب حلو أو مره ما ينراح أو ما ينسار ..يعنى أبداً مب مناسب نروح مكان معين في هالوقت وهكذا.. يوايق أو وايق ---يوايج أو وايجت: (القاف نفس لفظ الجيم المصرية) يطل أو يشوف أو ينظر وبالضبط أقرب معنى يطل على إنها نظرة سريعة ملبج أو ملبق : (بالجيم المصرية) علبة الكبريت ما يسد أو ما يسدهم : ما يكفيهم بيخوز أو خاز : بيروح أو بيختفي نقول بيخوز عنك المرض لو خذت الدوا أو خازت البقعة من على السجادة بعد ما غسلتها وهناك الكثير وما سبق نبذه عن أهم الكلمات المتداولة * * * وخلونا نختمها بقصيدة حلو أحبها وايد حي شوف الدار وأوطاني عيد سعدي يوم أوافيها مرحبا بج دار خلاني والعرب الأشراف لي فيها ما لودك في الحشا ثاني ماتعيض البلد لو أجيها كم نظرت وشفت بلداني ما سوت لو بت أراضيها من سبب شيخٍ بالأحساني سادها وأعلى مبانيها صانه الله طول الأزماني هو سنيدة عن بلاويها لي بغيت تشوف الحساني بالحياة إسكن نواحيها هوب شرق غرب يا فلاني ديرة الظبي أنا أعنيها بالإسم عن خوف عياني هي شفا الأبدان طاريها وقصيدة ثانية لروح الغالي الشيخ زايد الله يرحمه إنكتبت قبل وفاته يا زايد الخير لك خالص محبتنا نفديك بأرواحنا يا شيخنا الغالي إنت ضيا دارنا وعيون دولتنا والريس اللي تعلى الشامخ العالي غلاك في قلوبنا سبة سعادتنا يهناك حب العرب يا طيب الفالي سمح المحيا وشوفك يوم فرحتنا يا حي شوفك وحي ذاك لقبالي نمشي بأمرك وتمشي لك مودتنا بالطوع وإنته لها يا شيخنا والي وإنته سندنا إذا الدنيا تحدتنا وإنته لنا طال عمرك في وظلالي الله يحفظك لنا يا كل بهجتنا ترعاك عين الإله الواحد العالي وتعيش قايد وطنا ورمز وحدتنا يا محقق إلنا بفضلك كل الآمالي وبيتين دائماً أرددهم ما تعوضني سويسرا وشمة هواها عن دارنا دار الهنا والخير والغرب جملة ما يساوي ثراها في قلوب كل الناس تحظى بتقدير اتمنى ان الموضوع نال اعجابكم يلا ابي اشوف تفاعلكم ^_^ |
ابداااع يابنت الامارات بارك الله فيك الصراحة احلى شي بلهجة الامارات وكلها زينة بس هذي تعجبني :::: هيه وهي تقال بمعنى :/ نعمالصراحة شرحك رااائع جزاك الله خير بالنسبة لنا : مثلا اذا تفارق واحد عن صديقة يقول له : استر على ماواجهت , والثاني يقول :ماواجهت الا الطيب . |
امم بصراحة انتي مبدعة في طرحك..
حبيت أشاركك في اللهجة السعودية ونظراً لكبر مساحة المملكة تختلف اللهجات بس عالعموم بقول الأغلبية بعدين لهجة الحجااز يا لبىى ـــــــــــــــ شرح لبعض الكلمات في اللهجة السعودية عندما تريد السلام على شخص وتحيته :- هلا والله وغلا – وشلونك – وش أخبارك – وش علومك- كيف حالك عندما تريد أن تبلغ شخص مدى شوقك له :- وحشتني – اشتقت لك – فقدناك – والله لك فقده – والله لك وحشه – وينك ماتنشاف الرد عليه :- تشتاق لك العافية – والله القلوب عند بعضها – تسلم – أنا اكثر كلمات متفرقــه يسفه / يطنش : مثلا إذا واحد أزعجك يقولون لك اسفهه جر/ اسحب : مثلا واحد يقول جر الحبل بمعنى اسحبه تستخف دمك / تمزح : مثلا واحد يمزح تقول له تستختف دمك طس / اطلع برى يدبج / يصقع: يصطدم بشي ويحدث صوت مثلا واحد يقول دبج راسي بالطاوله دبشه: غبي ما يفهم يصمل : يجزم مثلا واحد يريد أن يشتري غرض تسأله أنت صامل يعني جازم مرتاع : خايف وشوله : ليش حامت كبدي : تقرفت مخفه : يعني سهل الواحد يلعب عليه ويصدق بزر: طفل يطس : روح عني : أبعد عن يعنى لو كنت معصب وتبي تقول لواحد روح بس بأسلوب مو حلو تقول له طس عني أهجد : مثلا إذا في طفل مزعجك تقول له اهجد شوي ضف وجهك : يعني اطلع برى نصاب ( مع شدة على حرف الصاد ) : كذاب تخب عليك : مثلا شخص يقول أنا صرت وزير يقولون له من باب الاستحقار فراش ويخب عليك بمعنى كثير عليك يجحدني: يعنى ما يعبرني مثلا أقول والله فلانه سلمت على الناس كلهم وجحدتني الطخمه : الحلوة السيب : الممر تونس- توجس : تحس الباب مردود : كأنه مسكر بس مو مسكر روعتني : خوفتني غدا رجال : صار رجال شكل : مثلا واحدا يقول فلن كلمنى وعطيته أشكل يعنى طنشته وما رديت عليه دريشة - شباك : نافذة يكفخ – يطق : يضرب شي كايد : صعب انطم : اسكت قلت ميده : قلت له تدربي راسك : يعني دبشة ماتفهم أنحاش : اهرب أطمر / انط : اقفز يتوزى : يختبي توحي : تسمع أزهلها : يعني اعتمد علي تستهبل : تستغبي بلشت / توهقت : تورطت جبت العيد : مثلا واحد ما حل زين في الاختبار واحد يسأله وش سويت ؟ يقول جبت العيد مقدم : مثلا وحده تقول لصديقتها ساعتك حلوه تقول لها مقدمه يعني هي لك واحيانا كثيره تصر الصديقه ان تعطي صديقتها الشئ اللي عجبها يولم : يجهز مثلا الام تقول لبنتها ولمي الغدا يعني جهزيه |
أسمحيلي أن أضيف بعض الكلمات الحجازية البحته القديمة :
اللاونطه : الكولونيا السموار : الإبريق الذي يـُغلي فيه الشاي الصُـفه : غرفة المعيشة المخلوان : غرفة فوق السطوح ( الملحق ) الفيتو : عربة الحصان ( الحنطور ) البسطون : عكاز من النوع الفاخر تكون بأيد وجهاء البلد النصاصين : أهل العريس صرفده : بسرعه شرنـّـقه : إبره ديدبان : حارس أمن مواعين : صحون الكـُرته : فستان مقـّـينه : كوافيره الدقديق : بطانيه الخارجه : البلكونه |
ماشاء الله تبارك الله
وش خليتي لنا غالب الكلمات جبتيها الف شكر لك اختي |
بنت الامارات ابدعتى وكفيتى ووفيتى و جهد مميز تشكرين عليه وعلى (هالرمسه)
حفيدة عائشه ماقصرتى ويعطيكى العافية (اشبك) |
ماشاء الله لهجة الإمارات حلوة
مع أن البحرين دولة صغيرة لكن منطقة تختلف لهجتها عن الثانية خصوصا أن البحرين تجمع بين عرب وفرس و هولة و أحوازين فــــ ( كيف الحال ) يعني عندنا شلونك و للأنثى شلونج وتنطق جيم |
موضـوع رآئع أختي الكريمة
ولي عودة قريباً |
موضوع جميل جداً وحلو الواحد يتعلم لهجات الغير
طبعاً لهجتنا حنا يا اهل الجنوب وبكل فخر ... نحاهو =انظراليه يابا يابا = ماللذي تفعله فرجه = جميله اقديتي = احسنتي صاح الله عليك = مجنون نوع من المعايره هههه اكووو عليك = يععععععععععع = اذهب واستحم هبيلي = اعطيني افلح = اذهب الله يدفع بي عنك = تقبرني = فديتك الهروج = الكلام باح = خلص البدايه = الشباك كراعيني = سيقاني قر = اهجد = اقعد مايرزى = عادي = مايهم السفان = الاطفال =البزوره =الورعان غدره = الظلام بضم ال غ كهله = عجوزه انافي حراك = انا في انتظارك بسباس = فلفل اسود مقحٌط = ضيق انطم = اسكت فاغره = فاتحه فمها =سرحانه او مفهيه كعشه = يعني شعرها منكوش =كدش شامز = مافي ملح =ماصخ المح = شوف يتشيدق = يستهزئ =يتريق يجدح = يغلي جهمه = الصباح الباكر قبس = نار يبرقط = يقول كلام مومفهوم كان = خلاص الصدقان = الاصدقاء يصرم = يدور او يشتغل (شي زي كذا) صامطه = بارده يظلي = يصبح =يصير حره = شاطره = سنعه =) ادبغها = لطشها مجمهر = وحده مصيبه = اوفالتها ألجغ = امضغ جهدا = بقوه القحم = كبير السن انفر = طير= اجري بسرعه مبرطم = زعلان |||||||||||||||||||\عساه مارضى هيله = حلوه = جميله ماشي هيله = لست بخير منقعر = نايم ازغد = اطفح ابصمي = اغلقي فمك خنفور او خنافر = انف محندر = ينظربشده = مفرصع الحواق = الشي المكنوس = القمامه على كراعه = على اخره يهول = يجنن = رائع مأشتي = مابغى يخرع = يفجع = مرعب مغزول = مهبول عزبه = اصبحت في سن الشباب دغابيس = اكله جنوبيه تجنن هويه = لماذا القروش = الفلوس تلوك = تقال بزعل ويعني تحوس مقرمط = ملفلف =مجعد وطيها = حطها =نزلها بقعا = اسم وحده من الجن الله يحمينا مجاره = محشومه وهذي لهجتي وافتخر فيها طبعا اغلب اللي باقي يرددها كبار السن والا حنا الله المستعان صرنا كوكتيل مع اختلاط المجتمع |
مرحبا الساع
فعلا نحب لهجتكم....وايد وايد وايد مشكورة |
ماشاءالله كفيتو وفيتو مابقى شي اقوله..
بس كمان في السعوديه الكلام يختلف شوي حسب القبايل والمناطق زي الجنوب كلامهم يختلف عن الرياض وجده وغيرها وسلامتكم |
حلوة ياريم الغلا....لهجتكم احب أسمعها
وأصعب اللهجات أهل فيفا....مرة كنا في زيارة لناس وجت جارتهم تكلمنا لكن مانفهم وصارت مضيفتنا تترجم....الله يذكرهم بالخير |
السلام عليكم
موضوع جميل و ودّي اسمعكم بعض الكلمات الاردنية طبعا انتوا بتعرفوا ان الاردن ينقسم الى شريحتين اجتماعيتين رئيسيتين وهما اردني من اصل اردني واردني من اصل فلسطيني الكلمات الاردنية من الاصول الاردنية: === قوّك : تقال للرجل الذي يعمل امر معين بمعنى يعطيك العافيه طبّه خاشق باشق : يعني اتخربطت اموره شاق ماق : امور عشوائية افلح: بكسر الالف بمعنى تفضل انهز الشوال: تأكد من تعبئة الشوال جيدا ( الشوال : لمن لا يعرف كيس من الخيش والخيش :لمن لا يعرف هو القنب) هذا الطور صلدم: هذا الحجر قاسي جدا طوّح الدمس: ارمي الحجر ( حجر صغير) لوح من ظهرها: اي انزل من على الركوبه كلمات من شمال الاردن لب الشي : اي منتصفه مثال( رجل عجوز يسمع خرفشه اي صوت غريب في شجرة التين خاصته فيقول: مَنُوه بلب التينه==> يجيب الصغير هاظ اني يا جدي ==> يقول العجوز : خمّنتك ضبع قبل ودي اطخك) وهناك كلمات كثيرة لا يسعني ذكرها الكلمات من الاصل الفلسطيني جميلة جدا وانا شخصيا احبها يلفظ القاف في اللهجة الفلاحية كاف وفي اللهجة المدنية ألف ويلفظ الدال تاء فمثلا (ذهبت امرأة الى الطبيب ومعها زوجها المريض فقالت للطبيب: يا تكتور والله ما كتلَه غير الرز اللي اكلَه كام بنص الليل وباللكن نتكَه) يعني ما قتله الا الرز الذي اكله وعندما قام بنص الليل استفرغ بالاناء شكرا لكم على هذا الموضوع المميز وارجو ان لا اكون اثقلت عليكم |
موضوع رائع لكن بنسبه لسعوديه - فمساحتها كبيره و مناطقها ، متباعده وكثيره جدا جدا فمن الخطأ إننا نقول لهجة أهل الشمال - بل الصح إننا نقول لهجة اهل حائل مثلاً .. ولهجة أهل عرعر وأهل الجوف وهكذا وكذلك من الخطأ إننا نقول لهجة أهل الجنوب بل الصحيح إننا نقول لهجة أهل ابها و لهجة اهل جيزان و لهجة اهل النماص وهكذا و هذا ينطبق على أهل الغربيه واهل الشرقيه وأهل الوسطى وفالحقيقه وجدت لهجات لو أحد يقول هذه اللهجات موجوده في السعوديه لا قلت له ( لا ليست موجوده ) . |
شكرا على الموضوع
|
| الساعة الآن 02:11 PM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir