ننظر اللي يصير وصمتنا مايصير = والجنايز يزيد العد بارقامها
وين مالدت عيونك تشوف السعير = ولعت في قراياها وفي شامها
سوريا تحترق والوضع فيها خطير = كل يوم الحرايق يكبر اضرامها
فرصةالصلح والاصلاح عيت تسير = بالفساد المكدس غاصت اقدامها
والجهود الاخيرة والقرار الاخير = بادرت جامعتنا ماتت احلامها
قامت الجامعة فعلا ٍبجهد ٍمنير = حاولت تمسك الازمة من ازمامها
في شروط ٍتنفذ في زمان ٍقصير = والشروط الاخيرة طافت ايامها
لكن الرد جاهم ما يبشر بخير = من قبل بادرتهم تنشف اختامها
النظام الذي يحكم بليا ضمير = فادحات الجرائم زاد لجرامها
حمص تنزف وينزف من وراها القصير = والمعره وادلب زادت الامها
دين الاسلام وصى بأحترام الاسير = وفيه ميات الاسرى قام بعدامها
عايد الشعب بالعيد الكبير الكبير = في قنابل يطيح الموت قدامها
سوريا شعب يبحث عن صناعة مصير = شعبها يشتكي من ظلم حكامها
يا عرب مانبي نسحب ونطرد سفير = حرروا شعب سوريه من اصنامها
انتفاضة شعب ذاق الاسئ والمرير = اربع اعقود شاف الضيم بعوامها
خلوا الدايره من فوقهم تستدير = زمرة الظلم والطغيان وازلامها
حظر جوي وفيه الطايرة ما تطير = ومنطقة تجمع الثوار با خيامها
كم غارة عليهم بالصواعق تغير = والدروع الثقيله تجمْع اكوامها
يا عرب سوريا في ربها تستجير = عبر الاعلام نسمع صيحة ايتامها
سوريا مسلمه والدين فيها شهير = نفتخر في عروبتها وباسلامها
سوريا ما لكم فيها شريك وخشير = انتم اولى بثروتها وبانعامها
من جميع العرب مطلوب دعم ٍكثير = كل دولة عليها تكرب احزامها
سوريا جيشها المقدام ماهو صغير = البطولة لزومٍ يلبس اوسامها
اعلنوا ثورة العصيان عبر الاثير = خلوا الكل يسمع عزفة انغامها
عززوا ثورة الاحرار سيروا مسير = شاركوا شعبكم في رزت اعلامها
واذكروا يوسف العظمة هذاك الوزير = تضحياته يشيد الكل باحجامها
حرروا داركم من ظلم فاسد واجير = واستعيدا لنا الجولان وانسامها
نسمة اهضابها وازهارها والعبير = والعقود القبيحة فكوا ابرامها
من تزيلون حكم النار والزمهرير = سوريا بالسعادة تعمر ايامها
ياعسى الله ينصركم ونعم النصير = والعدى في يديكم يكسر اعظامها