الله اعطاك ونحمده يومه اعطاك
والله يحب اللي بفضلـه يحمـدون
الحمد لك تعـداد دورات الافـلاك
والحمد لك اعداد كـلام يقولـون
والحمد لك تعداد عبـاداً تنصـاك
والحمد لك عدد حجيجن يطوفـون
والحمد لك عدد عطاياك ومزايـاك
وعـدد مخاليـق لذاتـك يلبـون
عطيتني واخجلتني فـي عطايـاك
وجملتني بالعقل والشكـل واللـون
فياالله جملنـي معـك يـوم لقيـاك
ولاتجعلن يالله من اللي يخسـرون
يالله ترحمنـا بعفـوك ورحمـاك
دايم تتوب عن الخلايق ويخطـون
ياالادمي لو طال عمـرك ومبنـاك
لابـد في يومـن مكفـن ومدفـون
جابتك امك والعرب تسمـع بكـاك
تبكي وربعك من فرحهـم يهلـون
خلك يومنـه حظـر يـوم فرقـاك
تضحك وكل اللي حواليك يبكـون