لغز شعري / من هو حبيبي يابعيدين الانظار

**جحافل** · 09-07-13, 10:42 PM

يسرني أن أهديكم أجمل قصيدة نبطية ،،

وهي عبارة عن (لغز) للشاعر سعود بن حمد بن جمهور الشمري
يتحدث عن حبيبه ، فهل عرفت من هو حبيبه ؟؟؟

يقول الشاعر :

أظنِّ ما في الحبِّ عيبٍ ولا عارْ .. ولا يِلامِ مْحِبّ في حُبِّ غاليّهْ

كلٍّ تَغَنّى في حبيبهْ بَالأَشْعارْ .. وَانا أتَغَنّى في حبيبي وَحَيِّيهْ

يا مَرْحبًا بالصاحبِ الغالِيِ المارْ .. اللي يِمُرّ ويَسعدِنِّي لِياليّهْ

كمْ عاشِقٍ غنَّى على غيرِ مِعْيارْ ..بالَغْ وْجامَلْ صاحِبِهْ في تَغَنِّيِّهْ

كبَّرْ محاسِنْ صاحِبِهْ لُو هِيِ صْغارْ .. وِبْحُكْمِ عاطِفْتِهْ تِجاهَلْ مِساوِيِّهْ

وانا حبيبي دونَ عَطْفِهْ تِسِتَّارْ .. الخيرِ كِلِّهْ فيهْ والسوءِ ما فيِّهْ

أوْفَى مِنَ الوافينِ وْهُو خِيرِ الاخْيارْ .. فيهِ الكرمْ والجودِ باسْمَى مَعانيِّهْ

يِمِرّنِي لَا مَرّ وحْمُولِيِ كْبارْ .. وِيْحِطِّهِنْ عَني بِتدبيرِ وَالِيِّهْ

اللهْ يِقَوِّي حُبَّنا طولَ الاعْمارْ .. حُبٍّ على وَضْحِ النّقَى لا رِيَا فِيِّهْ

لِيتِهْ يِجِيني بالسّنَهْ عِدّةَ أمْرارْ .. وْلُو طَوّلَ الغِيباتِ مانِي بْناسِيِّهْ

مَضمونِ يِرْجَعْ لِي بَامَرْ والِي الأقْدارْ .. لكنْ أنا مانِي بِمضمونِ ألاقِيِّهْ

وِانْ ما لقانِي لا رِجَعْ عُقْبَ الاسْفارْ .. ما هو بِبَاكِينِي وَانا لازِمْ أبْكيِّهْ

أهْلِ الهوى مِنْ طَبْعُهمْ حِفْظَ الاسْرارْ .. ومِنْ شانِ حِفظِ السرِّ ماني مِسَمّيّهْ

إلا بِرَمْزٍ بَيِّنٍ لَاهْلَ الافْكارْ .. وِاسْمِهْ رُموزِهْ يِكْشِفِنْ عن مَعانيِّهْ

لِلّي لُهُم بالعِلمِ مَوْرِدْ وِمِصدارْ .. عِلمِ القواعِدْ فاهِمينٍ مِبادِيِّهْ

اسْمِهْ خماسِي تِسمعونِهْ بتِكرارْ .. و(ما) له في بِني عمِّهْ سِمِيٍّ يِسامِيّهْ

ثلاثةَ اخْماسِهْ مِنِ النصفِ وِيْسارْ .. سَمَّى بِهن راعِي الْمُواشي مُواشِيِّهْ

وِانْ حِذَفْ ثانِي حرْفْ مَعْ (ثالثِهْ) صارْ .. الرّانْ كَمصدرْ وُهُو فِعلِ مَاضِيِّهْ

والكِلمِهْ اللي في لُغَتْنا لها ادْوارْ .. إذا رِبَطتْ آخرِ حْروفَهْ بْثانِيّهْ

تِسألْ بها عَمَّنْ جِهَلْتَهْ إذا زارْ .. وْاداةِ شَرْطٍ فِعلَها جزْمِ فِعْلِيّهْ

وْفِي جملةِ الموصولِ ما فُوقَهْ غْبارْ .. هذي حُروفَهْ نصٍّ مِنْ غِير تَشْبيّهْ

تِرَى حبيبي تَعْرِفِهْ كِلِّ الاقْطارْ .. أَحْدٍ يِرَحِّب بِّهْ وَأَحْدٍ ما يِدَانِيّهْ

مِنْ هو حبيبي يا بِعيدينَ الانْظارْ .. ياللّي تِعَرْفونَ الطّريقَ بْمُوارِيّهْ؟

أنْصَحْ وَاشِيرِ بِعِشْرَتِهْ وَانْتُمْ احْرارْ .. وْانْصَحْ بْطاعَةْ رَبّهِ اللّي مْزَكِّيّهْ

قِدّامِنا جَنّهْ وْقِدّامِنا نارْ .. وْقِدّامِنا قَبْرٍكْبارٍ بَلاوِيّهْ

وْقِدّامِنا يُومٍ عَسيرٍ لَلَاشْرارْ ..سَهْلٍ عَلى مَنْ يَسّرَ اللهْ مَساعِيّهْ

ما بِهْ وِسِيطٍ وَلا يْفِيدِنَّ الْاعْذارْ .. تِشْهَدْ على الإنسانِ رِجْلِيهْ وِايدِيّهْ

يَاللهْ يا غفَّارٍ يا نافِعٍ ضارْ .. تِغْفِرْ لنا ما تِعْلَمِهْ لُو نِخَفِّيّهْ

تِعْلَمْ دِبيبِ الذّرِّ في صُمَّ الاحْجارْ ..الخلْقِ خَلْقِكْ وِانْتِ رَبِّهْ وِبارِيِّهْ

تَمَّتْ وِصَلَّى اللهْ عَلى سِيدَ الْابْرارْ .. وَلا يِلامِ مْحِبِّ فِي حُبِّ غالِيِّهْ

فهل عرفتم حبيبه ؟؟

وإليكم القصيدة مسموعة :